سی حرفی | ° سلطان بن تاج °

سی حرفی

ا ب پ ت ٹ ث

 ج چ ح خ 

 د ڈ  ذ ؤ ز ر ڑ ز

 ژ س ش ص ض

ط ظ ع غ ف ق

 ک گ ل م ن

و ہ ء ی ے

الف اللہ توں بول ماہی

پھڑ تکڑی پورا تول ماہی

ب توں بات محبت والی

کناں  وچ ہمیشہ کول ماہی

پ توں سب پردیسی  نےجگ اندر

سب ناں کر جاونے بسترے گول ماہی

ت تختی تے ازلوں رب لکھیا

ایس گل وچ کوئی نئیں چول ماہی

ٹ ٹور ٹپے سارے عارضی نے

عمل کھیتیاں رہنیاں کول ماہی

ث ثمر ہر شے دا پاناں سب نے

اے گل نوں وستار نال کھول ماہی

ج جگ دا میلہ اے چار دن دا

فیر وجنے موت دے ٹول ماہی

چ چار دیہاڑے ہین پیار خاطر 

ناں گوا لئیے انپول ماہی

ح حج اے دید ہے ماپیاں دی

آیتوں ود نئیں سچڑے بول ماہی

خ خوشی ہوسی وچ جنتاں دے

میں جے اوتھے ہوواں تیرے کول ماہی

د دل دی گل تے کن ترئیے

عقل دیندی اے بندے نوں رول ماہی

ڈ ڈھونڈیاں رب وی مل جاندا

میں جے لکاں تے توں لویں ٹول ماہی

ذ ذیشان ہے سوہنا رسول سائیں

جیدا چت خیال انمول ماہی

ؤ وا وگے جد عشق والی

فیر ساہ لئیے دل کھول ماہی

ز زیر نوں زبر بنا دیندے 

دو پیار دے مٹھڑے بول ماہی

ر راتاں نوں جاگدے پیار والے

یاد یار دی رکھ کے کول ماہی

ڑ ڑڑھے تے چھڈ کے نس جاندے

بد نسل لوکی چھڈن رول ماہی

ز زہد عبادت ہے عشق کامل

باقی خیالڑاں دے سارے چول ماہی

ژ  ژوب نامی کوئی شہر دسدے

چل اس نوں دیکھئے پھول ماہی

س سراں نال سب سرداریاں نے

سراں باج دیون لوکی رول ماہی

ش شاہ حسین سی ولی رب دا

مادھو نام دا اوس دا سی ڈھول ماہی

ص صبر حسین جے ناں ہندا

دکھ دیوندے ککھاں نال تول ماہی

ض ضرورتاں دے انگ ساک سارے

غرضاں لے آون دشمن کول ماہی

ط طوطیاں بلبلاں قمریاں سب

سمن زار پھبن آون کول ماہی

ظ ظاہر تے باطن نوں اک رکھنا

بالے سوکھڑے کرن کلول ماہی

ع عشق دی گل سنا کوئی

کرکے دل  نوں دل دے کول  ماہی

غ غیر نئیں رب دا کوئی یارو

کرنا کفر ہے اے پرچول ماہی

ف فرض اے پکھے نوں ان دینا

باقی عمل نئیں ایس دے تول ماہی

ق قرض تے غرض مصیبتاں نے

دونویں چھڈدیاں جند نوں رول ماہی

ک کتا ناں چھڈدا وفاداری

وس روے جدوں تک کول ماہی

گ گیت گائیے سدا یاریاں دے

ایس کم وچ کرئیے ناں کول ماہی

ل لکھت متھے دی چھڈدی نئیں 

یوسف اٹی دے مل دوے تول ماہی

م موت سب قصے مکا دیندی

یاد رکھئیے سدا اے قول ماہی

ن نسلاں پچھاتیاں جان عملوں

پاٹ جاوندے قولاں دے ٹول ماہی

و وال دی کھل ناں لاوئیے جی

رہئیے کلا توں سدا انپول ماہی

ہ ہوس شیطان دا روپ دوجا

ایس چھڈیا آدم نوں رول ماہی

ء نال ناں بن دا کوئی اکھر

اساں لیتی اے لکھ پرچول ماہی

 ی یاریاں پالدے گل والے

نگلے دیوندے پیراں تھلے رول ماہی

وڈی ے دسے سانوں یار وانگوں

اے اکھر بالا انمول ماہی

لیکھک : سلطان الجہادی  (° سلطان بن تاج °  )

اے سی حرفی 

دوپہر دو وج کے ستائی منٹاں تے

پنجی نومبر ء دو ہزار تئی نوں لخی گئی